Täjigistanyň häkimiýetleri geçen hepde Moskwadaky konsert zalyna ýaraglar bilen hüjüm etmekde şübhelenýän dört täjik raýatynyň garyndaşlaryny saklaýar. Bu sorag etmeler Russiýanyň alyp barýan derňewiniň çäginde amal edilýär.
“Crocus City Hall” konsert zalyna edilen hüjümiň jogapkärçiligini “Yslam döwleti” ekstremistiki topar öz üstüne aldy. 22-nji martda adamlar sowet döwründen bäri meşhur rok toparynyň konsertine tomaşa etmäge taýýarlanan pursady, dört adam ýaraglardan ot açyp başlady we soňy bilen zaly oda berdi.
26-njy martdaky ýagdaýlara laýyklykda, hüjümde heläk bolanlaryň sany 139 adama ýetdi. Mundan başga-da, 120 töweregi adam şikes alyp, olaryň aglabasy ok ýa ýangyn ýaralary bilen, keselhana ýerleşdirildi.
Hüjümi amala aşyrmakda Russiýada zähmet migranty bolup işleýän dört täjik raýaty şübhelenýär. Bularyň dördüsi 24-nji martda Moskwanyň sudunyň hökümi esasynda, iki aý möhlet bilen deslapky tussaghana ýerleşdirildi. Bu şahslarda agyr ýenjilendigini görkezýän urgy yzlary bardy. Käbir tassyklanmadyk maglumatlarda, olaryň tussaglyk wagty gynalan bolmagynyň mümkindigi hem bellenilýär.
Täjigistanyň paýtagty Duşenbede we onuň töwereklerinde kanun goraýjy edaralar bu adamlaryň garyndaşlarynyň öýlerine geldiler we olary soraga çekdiler. Bu barada olaryň goňşulary we garyndaşlary Azatlyk Radiosyna gürrüň berdiler.
25-nji martda Duşenbäniň gündogaryndaky Wahdat şäherinde şübhelenýän hüjümçileriň biri Murodali Rajabalizodanyň ejesi, dogany, iki daýysy we beýleki käbir garyndaşlary öýlerinden äkidildi. Bu barada 25-nji martda ýerli bir işgär Azatlyga gürrüň berdi.
Beýleki bir şübhelenýän Muhammadszbir Faizowyň aýdyňlaşdyrylmadyk sandaky garyndaşlary hem Duşenbedäki öýünden äkidildi.
Täjik resmileri bu soňky çäreleri boýunça beýanat bilen çykyş etmediler.
Moskwada adamlar hüjümiň pidalaryny ýatlap, wakanyň bolan ýerine gül desselerini getirýärler. Halas ediş işgärleri, otda köp zyýan düşen desganyň harabaçylyklaryny arassalamak işlerini alyp barýarlar.
Russiýanyň döwlet eýeçiligindäki TASS habar gullugynyň maglumatyna görä, hüjüm bilen ilteşikli sekiz adama aýyplama bildirilipdir. Moskwanyň Basmannyý etrap sudy dört hüjümçä jaýy kireý berendigi aýdylýan, şahsyýeti aýan edilmedik bir adamy hem tussaglykda saklamak barada höküm çykardy.
26-njy martdaky ýagdaýlara laýyklykda, jemi hasapda sekiz adam tussag edildi we 11 adam deslapky tussaghana ýerleşdirildi.
Forum